Quatro Ciàcoe, ottobre 2002

Lettere dal Mattatoio de Renzo Cremona

di Mario Klein

Xe fadiga dire in dialeto le sensazion che se ga lesendo sta racolta de versi (la parola “poesie” la me pare ridutiva par sti testi) indaganti e intriganti. Cremona el pare inpegnà a smaterializare la realtà, par ricostruire su la so tracia ìsole de pensiero, conceti, idèe, inquietùdini e, de tanto in tanto, nostalgìe profonde, sfociando in imàgini “allusive”, che sotintende discorsi più anpi e difarenti.
Linguagio cólto, moderno, con uso inteligente de la parola, giacimento esplicito d’ogni forza segreta de la realtà. Afiora, tra i versi, un vago senso de delusion, de malstare; su la pèle de le parole ghe xe deposità una tension enorme, na specie de rabia che pare lì lì par scopiare. Provoca delusion el raporto co i altri; el tema del sociale l’òcupa el primo posto, però el poeta no ‘l se sbilancia, no ‘l dise quale che xe el so inpegno concreto “per non cadere preda del passato” (Arredamento), per evitare de èssare confinà nel “proprio spazio“, par modificare, insoma, sta situazion precaria stagnante. Sta “poesia dell’io” la ne ricorda la “cupa solitudine” de l’omo e la condana del vìvere, motivi tanto cari ai poeti de la poesia ermetica.
El cativo raporto col mondo e la vision negativa del reale non favorisse la quiete interiore, parché el pessimismo no ‘l aiuta a lèsare i colori del buio e le parole del silenzio. Ma, giustamente, el pensiero xe fato a strati, come i anèi del tronco de l’àlbero, el xe fato de stajon che se alterna. E gnente più de la poesia e del pensiero xe “mutevole”, cioè in créssare. Cussì, xe da spetarse che anca l’una e l’altro de sto autore i possa rivare a mostrare aspeti diversi, calcossa che se s-ciara a l’orizonte, parché xe fora discussion che Renzo Cremona xe poeta autèntico, “nella parola e nello spirito”.