Quatro Ciàcoe, Anno XXXIV n. 7-8 (luglio-agosto 2016)

Fossa Clodia de Renzo Cremona

di Mario Klein

Storie de tera e de aqua, che parla de Fossa Clodia, nome primitivo de Ciósa, de le so isole, le spiage, i canài, i ponti, i scorci, le barche. Storie de la zente e de le so paure, le so usanze, el giorno, la note, el tenpo “andato in malora”… e soratuto l’aqua che torna a ciapare possesso de quelo che gera suo, par dopo tornare a ponsarse in brazo al mare. Par poco, parché dopo la tornarà a ocupare le strade e le piaze incatramà, quasi par ricordarghe a l’omo de sbassare le ale de la so aroganza, parché sta “città di terra” el la ga solo in afito.
Questi i temi delicati, profondi, metafisici, afrontà in modo originale dal poeta, scritore, “poliglotta” ciosoto Renzo Cremona in sto libro in prosa poetica, scrito in italian e in dialeto ciosoto […]. Consiliemo el letore – el nostro letore, ‘bituà a i testi in dialeto – de partire dal fondo del libro, dove te na trentina de pàgine (con traduzion a fianco) ghe xe un “saggio filosofico”, le parole le fa busi, un dialogo sul valore, sul peso, sul male che pole fare le parole. Dopo, se pol tacare da l’inizio e ‘ndare a la scoperta de la Fossa Clodia de i giorni nostri. Par chi ga fame e sen de poesia, anca se non in versi, in sto libro ghe n’é par i beati paoli. Eleganza e rafinateza de linguagio rende onore a la enorme creatività de l’autore.